Kári Egilsson leikur á píanó ásamt bassaleikaranum Nico Moreaux og trommuleikaranum Matthíasi Hemstock, saman spila þeir fjölbreytta efnisskrá með lögum eftir Kára og sérvöldum lögum eftir aðra. Kári hefur verið virkur í íslensku tónlistarlífi undanfarið og hann var valinn Bjartasta von Íslensku tónlistarverðlaunanna 2024.

Pétur Ernir og Sigríður Ásta eru bæði gamlar sálir sem mætast í mússík. Þeim finnst fátt skemmtilegra en að mússísera saman, ögra áhorfendum og sjálfum sér með löngum þögnum og veikum tónum. Efnisskráin er innblásin af gamalli kvikmyndatónlist, enda eru þau bæði væmnari en góðu hófi gegnir og hlakka til að velta sér upp úr öllum tilfinningunum á Björtum Mússíkdögum.

Tríóið Góss er skipað Sigríði Thorlacius og bræðrunum Sigurði og Guðmundi Óskari Guðmundssonum. Þau hafa undanfarin ár flakkað spilandi og syngjandi um landið. Prógramið eru lög héðan og þaðan - frumsamin lög og tökulög, íslensk ættjarðarlög og erlend dægurlög. Allt í bland og öllu skellt í einhverskonar þríraddaðan sveitabúning.

Allt frá því að Silva Þórðardóttir (söngur) og Steingrímur Teague (söngur, hljómborð) hittust fyrst yfir eplaköku og svörtu kaffi hafa þau lagt sig eftir því að draga fram hið mannlega, brothætta –– og örlítið myrka ––í söngbók jazzins. Á tónleikum er lagt uppúr sterkri nánd og hljóðan radda, en píanó- og wurlitzerleikur Steingríms er allur með mýksta og hljóðasta móti, þó að vissulega sé stundum gefið örlítið í.

Rúnar Þórisson er kunnur fyrir leik sinn með hljómsveitinni Grafík. Hann hefur að auki sent frá sér sex sólóplötur sem allar hafa hlotið afbragðs dóma og sú sjöunda er nú á leiðinni. Á tónleikunum mun Rúnar ásamt Hálfdáni Árnasyni, Daða Birgissyni og Unni Birnu Björnsdóttur leika tónlist þar sem þær systur dimma og birta takast á og leita sátta í flaumi svartra og hvítra nótna og orða.

Krumma þarf vart að kynna en í fljótu bragði má nefna hljómsveitirnar Mínus, Legend og Esja en undanfarin ár hefur Krummi Björgvinsson unnið að sinni fyrstu sólóplötu og færst nær þjóðlaga og söng/lagahöfunda tónlist í sinni sköpun. Þá hafa smáskífur hans Stories To Tell, Frozen Teardrops, Bona Fide og ábreiðan Vetrarsól gert það ákaflega gott síðustu misseri.